UN ONOREVOLE

Un  Onorevole ... ùn ad Castalnòv

un prufesùr ... che l' insgnèva  in tal' scòll

d'acord con "qui ad Roma" e i so amigh ad Règg

vèst che in muntagna , la va sempre pègg

e s'è tant da dà far ... perchè i nostre munt

i dventàne un Parco .. ma .. senza tgnìr cunt

che in mez a cu' Parco ... che i vòlne creàr

en gh'è mia sul di bosch ...ma anch  i muntanàr!!

Sgnùr Onorevole , scusà l'aruganza

ma la vostra istruziùn ... a la mè ignuranza

l'agh dèv aspiegàr .. in mòd , che a capèsa

come mai , nunustànt , tuc i pàrch , ien in rmèsa

perchè propria e nostre , è duvrè funziunàr ??

O gh' è un quaich amigh ... da sistemàr ?

Vù ... che ad mistèr , ai' insignà ai student

di nostre problema  , an' aì capì gnènt !!

I giòvne oramai ... ièn quasi sparì

un po  iàn tgnù bòta ... pò... i s'en avilì

e ien emigrà ... tùc ... vers la cità

i turnane in ferie ... suquànc dì d'està .

Lasà stàr al ball e guardàv un po' arènt

ad chi vèv , in muntagna .. an v'in frega gnènt ??

Ad  chi , sul pr'andar a e lavùr o a studiàr

al 6 ad la matina , es dèv asvagiàr ??

Sgùr Onorevole , se agh'ivi pacència

con un po ad bun sens e .. d'inteligenza

l'èra asà sulament ... aspetàr un po d' ann !?

Girà prì paès ?!  E gh'è sul di anzian !!

I rturnàne tùc , quand ièn in pensiùn

e i s'acuntènten d'aver ... la sudisfaziùn

dop una vèta ,  pre mònd , chisà dòa

d'apsèr  arturnar , a murìr a cà sòa !!

Cumpàgn a una volta , quand a gh'erne in tanc

is vòlne tgnìr sempre ... puvràtt e ignurant

e se i vòlne e Parco .. il fan .. anch par forza

an sàma gnanch pù .. padrùn a cà nostra !!!

L'è mej che in muntagna , agh mulàm di cinghià

suquanc cavariò  e ... di lùv afamà

una bèla foresta , con ogni animàl

acsè , chi  egh'è armàs ... es tòs via dal bàll .

  Antonio Manini     Marzo 2002